Қазақстанда құрылтай депутаттарын сайлауға дайындық жұмыстары кезең-кезеңімен жүргізілуде. Сайлау науқаны заң талаптарына сәйкес ұйымдастырылып, барлық рәсімдердің ашықтығы мен жариялылығын қамтамасыз етуге басымдық берілген.
Сайлау процесі бірнеше негізгі кезеңнен тұрады. Алдымен сайлауды ұйымдастыруға жауапты комиссиялар қажетті дайындық жұмыстарын жүргізіп, сайлау учаскелерінің талапқа сай жұмыс істеуін қамтамасыз етеді. Сонымен қатар сайлаушылар тізімі нақтыланып, тұрғындарға өздерінің сайлау учаскесі туралы ақпарат алуға мүмкіндік беріледі.
Сайлау күні әрбір азамат заңнамада белгіленген тәртіппен өз таңдауын жасау құқығына ие. Дауыс беру барысында сайлаудың ашықтығы, әділдігі және заңдылығы қатаң сақталады. Сайлау аяқталғаннан кейін дауыстарды санау рәсімі жүргізіліп, нәтижелер белгіленген тәртіппен жарияланады.
Алакөл ауданында да сайлауға дайындық жұмыстары жоспарға сәйкес жалғасуда. Сайлау учаскелерінің материалдық-техникалық дайындығы пысықталып, жауапты қызметтердің өзара үйлесімді жұмысына ерекше назар аударылуда. Сондай-ақ тұрғындардың сайлауға қатысты ақпаратқа қол жеткізуі және дауыс беру процесіне қолайлы жағдай жасау бағытында қажетті шаралар қабылдануда.
Құрылтай депутаттарының сайлауы – азаматтардың қоғамдық-саяси өмірге қатысуының маңызды тетіктерінің бірі. Сондықтан әрбір сайлаушы өз құқықтарын біліп, белгіленген күні дауыс беруге қатысу арқылы елдің қоғамдық дамуына өз үлесін қоса алады.
Алакөл ақпарат.