Бүгін мемлекет басшысы Қ.Тоқаев кезекті Жолдауын жария етіп, ел дамуының, жаһандық бәсекелестіктегі бәсіміздің басым түсуінің негізі болатын басым бағыттар жайында айтып өтті.

Пандемия салдарынан салы суға кетіп, дағдарыс дауылынан әбден шаршаған халыққа көмек қолын созу, ең төменгі жалақы көлемін 60 мың теңгеге жеткізу, ауыл шаруашылығы саласындаға шаруаларға демдесу, вакциналау мен коронавируспен күрес шараларын ұлғайту, цифрландыру мен жаңа технологияларды енгізу мәселесін көтерді.

Соның ішінде ауыл шаруашылығы жерлерін қолынан іс келетін азаматтарға беру, шетелдіктерге жерді сату және жалға беру ісіне нүкте қою, жем-шөп дайындау мәселесін ретке келтіру, батыстағы жұрттың биылғы қиын жағдайынан сабақ алып, мал азығын реттеуді ұйымдастыру және ветеринария саласын реформалалау тақырыптары өте өзекті деп білемін.

Төскейінде төрт түлігін өрбіткен халқымыз ежелден малдың күтіміне баса назар аударып, түздегі тірлікпен бар тұрмысын байланыстырып келді. Қазірдің өзінде қора-қора түлік асырап отырған азаматтар қанша. Әсіресе ауылдық жерлердегі шаруаларға мемлекет тарапынан субсидия қарастыру және барынша кәсіптерін дамытуға қол ұшын созу ісі назардан тыс қалмағаны жөн.

Мемлекет басшысы бұл Жолдауында елдегі барлық мәселелерді үртіп өтіп, қажетті деген шараларды қолға алды. Ел еретеңінің жарқын болуы және қарқынды даму даңғылына түсу осы басым бағыттардың оңтайлы жүзеге асуымен тікелей байланысып жатыр.

Б.САЯТОВА,

облыстық мәслихат депутаты.