Бүгінгі таңда күн санап атақ-абыройы артып келе жатқан «Тарлан» спорт кешені жуырда өзінің бір жылдығын атап өтті. Мерекелік күнге орай жасөспірім ұлдар мен қыздар арасында еркін күрестен аудандық турнир жалауын желбіретті.

Сөз алған аудандық дене шынықтыру және спорт бөлімінің басшысы А.Садиев нақты аудандағы спорт ахуалын бір шолып шығып, бір жылдығын дүрілдетіп өткізіп жатқан Тарланның алдағы сапарына сәттілік пен толағай табыстар тіледі.

Доданың бас төрешісі Н.Тоқтабаевжарыстың өту тәртібі мен ережесін таныстырып, тартысқалы, шабысқалы келген спортшыларға барларын салуды міндеттеді.

«Тарлан» спорт кешенінің директоры М.Ахметов ұжымның осы күнге дейін атқарған жұмыстар легіне тоқталып, аз ғана уақытың ішінде бағындырған белестеріне тоқталды. Сондай-ақ барша қатысушыларға тек жүйріктері аламан басынан көрінсін деген тілегін білдірді.

Уағдалы уақытында басталған бәсекеде аудан аумағынан 7 құрама, жалпылай алғанда 120 спортшы бап пен бақ таласына түсті.Боз кілемнің шаңын қаққан балғын балуандардың шеберлігі көрермендерді де тәнті етпей қоймады. Кезек кезегімен белдесуге шыққан ұл-қыздар жигалғандардың да делебесін қоздырып, чемпион атану үшін ба күш-жігерлерін сарп етті.

Бұл белдесуде 30-дан аса тарландықтар қатысып, олардың 3-еуі алтын, 7-еуі күміс және 9-ы қола медальға ие болды.

А.ЕСЕНБЕКОВ.