Тіл – ұлттың жаны, халықтың рухы. Тілі жоғалған жұрттың өзі де жер бетінен біржола жойылмақ. Атадан балаға аманат болған ана тіліміз – ұлы мұрамыз, сарқылмас қазынамыз. Қара тасқа қашалғандай, халқымыздың бүкіл болмыс-бітімі, салт-санасы, өр рухы осы тілінде сақталған.
Тіл – тарихтың куәсі, ұлттың айнасы. Тіл болмаса, елдің өткенін білмек түгіл, ертеңін болжап, келешегін кемелдендіру де мүмкін емес. Тарихтың тәлкегіне төтеп берген, талай жаугершілік заманда от пен судан өтіп аман қалған қазақ тілінің құдіреті шексіз. «Өзге тілдің бәрін біл, өз тіліңді құрметте» деген даналық сөз бекер айтылмаса керек.
Ана тіліміз – ата-бабамыздың ақ батасы, ананың әлдиі, жыраудың жыры, ақынның шабыты, шешеннің көсем сөзі. Қазақ даласын күмбірлеген күйімен тербеген Қорқыт бабамыздың, от ауызды, орақ тілді Төле, Қазыбек, Әйтеке билердің ұлағатты сөздері, кешегі Абай, Мағжан, Мұқағали жырлаған көркем қазақ тілі – бізге жеткен баға жетпес байлық.
Тіліңді қадірлеу – еліңді қадірлеу. Тілін сыйлаған жұрт – өзін сыйлаған жұрт. Тілінен безген адам – тамырынан қиылған бәйтерек тәрізді. Ана тіліңде сөйлеу – тек міндет емес, жүректен шыққан, жанның асыл сезіміне айналған қасиетті парыз. Тілі жойылған халық – үнсіз қалған даладай құлазып қалады. Сол себепті, ана тілімізді асқақтатып, мәртебесін көтеру – біздің басты борышымыз.
Тіліміздің нәрі – тұнық бұлақтың суындай, оның әрбір сөзі – жауһар тастай құнды. Қазақтың сөзі көркем де құнарлы, мағыналы да нәрлі. Біз сөз қадірін өз қадіріміздей қастерлейтін халықпыз. Олай болса, асыл тілімізді шұбарламай, таза күйінде келер ұрпаққа аманат ету – бүгінгі біздің ұлы міндетіміз.
Тіл – ұлттың тұғыры, рухтың тірегі. Оны сақтау – саналы ұрпақтың борышы. Туған тілін қастерлемеген адам тамыры шабылған ағаш секілді, көктемей, солып қалады. Әрбір қазақ баласының бойына ана тілін сіңіріп, оның мән-маңызын ұғындыру – елдігіміздің белгісі. Тіл – халықтың жаны десек, оны мәңгілік ету біздің парызымыз.
Бабалардан қалған асыл аманатты ардақтап, туған тілімізді төрге шығарайық! «Бірлік түбі – тірлік» демекші, тіл тұтастығы – ел тұтастығы. Ана тіліміз – ең асыл құндылығымыз екенін ешқашан ұмытпайық!

А.БУТАБАЕВ,
Алакөл аудандық орталық ауруханасының директоры.