Аудан көлемінде «Тіл тазалығын сақтайық» акциясы басталды. Қазақстан Республикасының «Тіл туралы» және «Жарнама туралы» Заңдарының халыққа қызмет көрсету орындарында сақталуын қадағалайтын бұл акция Қазақстан халқы тілдері күніне дейін өз жалғасын табады. Шараны өткізу үшін аудан әкімінің қаулысымен арнайы комиссия құрылған. Оған тілдерді дамыту орталығының мамандары, жастар ресурстық орталығы, БАҚ қызметкерлері мүшелік етеді. Аталмыш шара аясында барлық халыққа қызмет көрсету нысандары иелеріне заң аясында түсіндіру жұмыстары жүргізіледі.
Қазақстан Республикасының «Тіл туралы» Заңына сәйкес барлық жарнамалар мен қызмет көрсету нысандарының деректемелері алдымен мемлекеттік тілде жазылуы тиіс. Соған қарамастан Үшарал қаласы орталығындағы біраз нысан әлі де қателіктерін түзеуге асығар емес. «Ұлытау» кешені мен «Достық» сауда орталығына бұған дейін де бірнеше ескертулер берілген. Маңдайлашарына ілінген жазбаларды бірнеше жылдан бері өзгерткен жоқ. Сондай-ақ «Алатау» шағын маркетіне де атауының әріптерінің толық толмауына байланысты ескерту берілді. Осы тұрғыда қала көркіне де қызмет көрсету орындарының әсер ететінін ұмытпаған жөн. Сонымен қатар «Алдияр» сауда орталығына лексикалық қателіктеріне байланысты нысан алдындағы жарнаманы ауыстыруға уақыт берілді. Д.Қонаев көшесін жағалай орналасқан ірілі-ұсақты халыққа қызмет көрсету орындарына түсіндіру жұмыстары жүргізіліп, арнайы парқшалар таратылды. Жарнама жасайтын кәсіпорындарға барып, нысан иелеріне жарнама жасау барысында заңды қатаң сақтауын талап еттік.
Тіл тазалығын сақтау – тек заң алдындағы ғана емес, ата-баба алдындағы азаматтық парызымыз. Парызға адал болу – шарт, тіліміздің табиғи айналымын сақтау – міндет. Әрбіріміз тіліміздің тұғырының биік болуына үлес қосайық.
А.ЖЕЛДІБАЕВА,
Әл-Фараби атындағы ҚазҰУ-дің журналистика факультетінің 2 курс студенті.