Тіл – тек адамдар арасындағы қатынас құралы ғана емес, сонымен қатар әр ұлттың өзіне тән болмысын, ерекшеліктерін екшейтін құндылық. Оның табиғи таза қалпын сақтау мемлекет болашағына да оң әсерін тигізбек.

Жуырда аудандық мәдениет және тілдерді дамыту бөлімінің ұйытқы болуымен «Тіл тазалығын сақтайық!» атты акция басталды.

Зерделеу барысында шаһарымызда орналасқан 13 нысан қамтылып, деректемелер мен жарнама тақтайшалары ҚР «Тіл туралы» және «Жарнама туралы» Заңдарының талаптарына сай орналасуы мен сауатты жазылуы тексерілді. Сөйтіп қала аумағында бой көтерген біршама дүкендер мен тамақтандыру орындарының маңдайша жазуларынан және көрнекі құралдарынан (хабарландырулар, жарнамалар, прейскуранттар, деректемелер) 7 қателік анықталды. Атап айтсақ, «Ұлытау» кешені мен «БМ», «АЗС №7», «ҚазМұнайГаз» жанар-жағармай бекеттерінің көрнекі құралдарындағы жазбалар тек орыс тілінде берілсе, «Путник» дәмханасының жарнамаларында стилистикалық қателіктер тіркелді. «Алматы» дүкенінде жазбалардың орналасу тәртібінде олқылықтар байқалды. Ал аудандық орталық аурухананың бірнеше кабинеттеріндегі көрнекілік құралдарының қазақша аудармасы болмай шықты. Кемшіліктер бойынша ескертулер жасалып, түзетуге он бес күн уақыт берілді. Белгіленген мерзім ішінде олқылықтар жойылмаса 10-50 айлық есептік көрсеткіш аралығында айыппұл салынатыны да айтылды.

Жоғарыда айтылған заң талаптарын толықтай сақтаған нысандар да жетерлік. Солардың ішінен «Royal Petroleym» ЖЖБ мен «Рынок» базарын ерекше атап өтуге болады.

АЛМАТ ЕСЕНБЕКОВ