Заң – барлығымызға ортақ. Еліміздегі құқықтық шаралар ең алдымен Ата заңымызда айқындалып, күнделікті тұрмысымызға еніп отырғандығы рас. Сондықтан да халықтың құқықтық сауаттылығы мен қылмысқа нөлдік төзімділігі аса маңызды.
Заң – әрқайсымыздың өмірлік ұстанымдарымызды жалпыға ортақ, ешкімге кесірі тимейтін жолға бағыттайтын құрал. Бұл ретте заңдық қағидаттардың шекарасынан ары аспаған азамат қылмысқа да кері пікірде қарайтыны сөзсіз. Әсіресе құқық қорғау органдары қызметкерлерінің қылмыспен күрестегі табандылығы мен төзімділігі өзгелерге үлгі болуы керек.
Күніне қырық құбылған қоғамда арагідік заң шеңберінен аттап, қылмысқа жол беріп жататындар да бар. Сайып келгенде, өз игілігің үшін деп жасалған дүние ақыры соңында орасан зор кесірін де алып келіп жатады. Бұндай мезетте құқық қорғау органдары қылмеспен күресте әркез тастай берік төзімділік көрсете отырып, толымды тәжірибелерінің арқасында суыққандылық танытулары қажет. Әр қылмыстың артында бүтіндей бір адамның тағдыры тұруы мүмкін. Сондықтан да қызмет барысында кемшілікке жол бермеу және қателіктерді болдырмау – нағыз құқық қорғау органдары қызметкерінің бейнесі.
Заң мен тәртіпті қатаң сақтау қағидаты мемлекеттік деңгейде дәріптелуі керек. Заңдылық пен тәртіп қағидатын орнықтыру ісі вандализм, балаларға қарсы қылмыс, тұрмыстық зорлық-зомбылық сияқты жағымсыз құбылыстармен күрестен басталады. Мұндай құқық бұзушылықтарға қойылатын алғашқы және өте маңызды тосқауыл – азаматтардың оларға бейжай қарамауы. Сондықтан елімізде жүгенсіздіктің, озбырлықтың және қылмыстың кез келген түріне мүлдем төзбеушілік ұстанымын қалыптастырудың мән-маңызы зор. Қоғамда белсенді азаматтық көзқарас үстемдік құрып, ізгілік, тілектестік, өзара көмек сияқты басты құндылықтар дәріптелуге тиіс.
Кез келген қылмыс түріне жазаны күшейту, оның алдын алу және қоғамда құқықбұзушылыққа нөлдік төзімділікті қалыптастыру – ел билігінің басым бағыттарының бірі саналады. Бұл ретте сол қылмыстың алдын алу мен болдырмауда немес қатаң жаза тағайындауда құқық қорғау органдарының үлесі мол. Ел мүддесі үшін еңбек етіп, халық игілігін көздеген бұл азаматтардың құрметке лайықты екендігі даусыз. Сол өздерінің берік әрі биік ұстанымдарын, қатқыл қағидаттарын ұстана отырып, бұқараға үлгі-өнеге болуылары да заңдылық.
Ерлан ҚАСЫМБАЕВ,
Алакөл ауданының прокуроры, аға әділет кеңесшісі.