Ұлт биігін ұлықтаған Елбасы Н.Назарбаевтың «Болашаққа бағдар: рухани жаңғыру» атты тағылымды туындысында көтерілген «Туған жер» бағдарламасы аясында ауданымыздың атымтай азаматтары бірталай игілікті істердің бой көтеруіне ұйытқы болуда.

Оның айқын дәлелі ретінде Ынталыдан жеткен сүйіншілі хабарды айтуға болады. «Ұшқын» шаруа қожалығының төрағасы Ділдебаев Амантай Мамыржанұлының және ауыл тұрғындарының демеушілігімен аталмыш ауылда 160 орындық Алла үйі қолданысқа берілді.

Мешіттің ашылу салтанатында өңір басшысы Ә.Жақанбаев руханият ордасының есігін айқара ашып, көптің қалауына жан бітірген А.Ділдебаев пен құрылысын жұмыстарына атсалысқан ауыл тұрғындарына алғысын білдіріп, Ислам құндылықтарына жол ашып, имани түсініктің тұғырын тіктегендері үшін рахметін жеткізді.

Талдықорған қаласындағы орталық «Иман» мешітінің найб имамы Ө.Шынарбек пен Ынталы ауылдық округі ардагерлер кеңесінің төрағасы Қ.Есімбеков елдің игілігі үшін руханият ордасын тұрғызған атымтай азаматтың суапты ісіне ризашылық білдірді.

Күмбезі күнге шағылысқан ғибадат орнының салынуына ұйытқы болған А.Ділдебаев  халықтың қамы үшін еңбек ету әр азаматқа парыз екендігін тілге тиек етті. Жомарт жерлестерінің еңбегін елеусіз қалдырмаған ауылдастары оның иығына шапан жапты.

Ауданның бас имамы Ә.Молдахметов құран оқып, ақ жаулықты әжелердің шашуымен мешіттің лентасы қиылды. Жиылған жамағат Алла үйінің табалдырығынан аттап, уағыз тыңдап, имани білімге сусындап қайтты.

Н.МАҚСАТҰЛЫ.