Барша қазақтың маңдайына біткен шоқжұлдызы,  аты мен атағы алты құрлықта танылған ақтаңгер азамат, билікте отырса да өзін халықтан биік қоймаған заманының заңғары, қыл көпірде жүрсе де ұлан-ғайыр даламыздың өзгенің таптауында қалмауы үшін басын бәйгеге тіккен мыңжылдықтың маңғаз тұлғасы, көрнекті қоғам және мемлекет қайраткері, Социалистік еңбек ері Дінмұхамед Қонаевтың туғанына биыл 107 жыл толып отыр. Даңқы мен парқы алпыс нарға жүк болатын атпал азаматтың есімін ұлықтап, естеліктерді жаңғырту мақсатында атамыздың атымен аталған орталық алаңда еске алу шарасы ұйымдастырылды.

Оған бөлім, мекеме басшылары мен қызметкерлері, қоғамдық ұйым мүшелері мен қала тұрғындары, ұстаздар мен белсенді жастар қатысты.

Шараның шымылдығы Д.Қонаевтың ескерткішіне гүл шоқтарын қоюдан басталды.

Сөз алған Үшарал қаласының әкімі М.Сайдильдинов Дінмұхамед Ахметұлының өнегелі өткенінің өрнекті тұстары жайлы сөз қозғап, есімінің есімізде мәңгілік сақталатынын баса айтты.

Ауданның Құрметті азаматы, ақын Т.Садиев тау тұлғаның мемлекет басқарудағы ерен еңбегі мен ерлігіне тоқталсып, жалынды жырын арнаса, аудандық ардагерлер кеңесінің мүшесі Ж.Жұманов ақтаңгер азаматтың соңғы демі Алакөлдің бойында үзілгенін және бұл өңірдің ол кісі үшін орны ерек болғандығын жеткізді.

Артынша Үшарал №2 орта мектебінің Үшарал №2 орта мектебінің психологы А.Тынысбекова жастардың талмай, танбай көзтігер темірқазығына айналғандығын мақтана айтып, қатарластарын  аталарындай білімді, білікті, талапты, табанды болуға шақырды.

А.ЕСЕНБЕКОВ.