Жуырда қиын өмірлік жағдайға тап болған немесе зорлық-зомбылыққа ұшыраған отбасы мен балалары бар аналарды қолдау бойынша «Nur Otan» партиясының сайлауалды уәделері аясында еліміздің әр қаласы мен ауданында 234 орталық ашу мәселесі Отбасы, әйелдер және балалардың құқықтарын қорғау мәселелері жөніндегі республикалық қоғамдық кеңестің отырысында қаралды.

Аталған кеңестің төрайымы, Мәжіліс депутаты Динара Закиева осы бағытта атқарылып жақтан жұмыстар легіне тоқталып, бас партияның бастамашыл істері жайында біраз мағлұмат беріп өтті.

«Nur Otan» партиясының «Бақытты отбасы» бағдарламасы аясында қиын жағдайға тап болған 80 мың отбасыға түрлі бағытта көмек көрсетілген. Ел аумағында 2,3 мың жедел әрекет ету топтары жұмыс істеуде. Биыл осы арқылы 17 мың адам көмек алып, 10 адам жұмысқа орналасқан. 17,3 мың балаға спорттық кешендер мен үйірмелерге қатысуға мүмкіндік берілді.

Шара барысында Ақпарат және қоғамдық даму министрлігінің Жастар және отбасы істері комитетінің төрағасы Шахмардан Байманов отбасын қолдау, отбасылық жанжалдарды шешу және балалары бар әйелдерге уақытша тұруға ұсыну үшін 2025 жылға дейін 234 орталық ашу бойынша жүргізіліп жатқан жұмыс туралы айтты.

Бұл келелі шешім, кемел бастама деп білемін. Себебі, қазіргі таңда ерте ажырасу, балалардың ата-анасыз қалуы, ұрыс-жанжалдардың көбеюі сынды мәселелер жиілеп кетті. Қазақстан аталған тақырыптар бойынша алдыңғы қатарлы орындарда тұр. Осы түйіткілдің шешімін шығару мақсатында арнайы орталықтардың құрылуы баянды болашаққа қарай басқан қарымды қадам деуге толықтай негіз бар.

Алмат Есенбеков,

Алакөл аудандық мәслихатының депутаты.