Ел аумағындағы дүрбелеңнен кейін Мемлекет басшысы халықтың талап-тілегін ескере отырып, Мәжіліс отырысында өзгерістерге қарай бастайтын тың ойларын ортаға салды. Бейбіт шеруге шыққан бұқараның барлық сұраныс-ұсынысы ескерілді.

Жиын барысында соңғы оқиғалардың мемлекеттің экономикалық-әлеуметтік жағдайына, сондай-ақ қарапайым халықтың тұрмысына қандай орасан зор кесірін тигізгені айтылды. Билік қоғаның көңілінде көлкіген көл сауалдарды естіді, енді тиісті шешімдер қабылдануда.

Айтылған сөз, мұқым елдің аманаты аяқ астында қалмаса игі. Нақты жоспарлар бар, соған орай әрекет, жүйелі жұмыс атқарылса құба құп. Президенттің Үндеуінен еліміз үлкен өзгерістерге бет бұрғанын аңғардық. Халық қолдап, қолпаштай түседі деген сенімдемін.

Мінберде көтерілген мәселе мол. Нарықтағы баға тұрақсыздығы, жалақы мен өмір сүру сапасының төмендігі, билікте, биікте отырған кей топтасқан адамдардың үлкен мөлшердегі жемқорлығы да сөз болды. Сыртқа кетіп жатқан қомақты қаржы, талан-таражға түскен ел байлығы да назардан тыс қалмады. Осыған орай мемлекет тарапынан қатаң шаралар қабылданып, сөзден іске көшетіндігі де байқалды.

Жиналғандар талқысына экономиканы тұрақтандырудың тың жолдары, ел қауіпсіздігі мен бүтіндігін сақтау шаралары, эскпорт пен инпортты өркендетудің жаңаша мүмкіндіктері, инвестиция тарту, орта және шағын кәсіпкерліктен нәпақасын тауып отырған жұртшылыққа демдесу, қаржы нарығын реттеу, жастар тәрбиесіне жіті назар аудару, білім беру жүйесін жандандыру, экстремизм-терроризм сынды әрекеттерге тосқауыл болу мәселелері түсті.

Жаңа Үкіметтің міндет-мақсаты Президент тапсырмаларын тиісті бағытта, халық мүддесін көздей отырып орындау. Қоғамның наразылығын толықтай назарға алып, олқылықтар мен кемшіліктерді жою. Сол арқылы бейбіт те берекелі тірлігімізге қайта оралып, Қазақстанды өркендету, елімізді жаңа белестерге шығару. Ол үшін билік пен бұқара арасындағы өзара ынтамақтастық пен татулық, түсіністік пен өзара келісімнің болуы аса маңызды.

Алмат ЕСЕНБЕКОВ,

«Алакөл» газетінің бас редакторы, аудандық мәслихат депутаты.