Жуырда «Жас отау» бағдарламасы аясында аудандық ішкі саясат бөлімінің ұйытқы болуымен отбасы құндылықтарын нығайту, тұрмыстағы проблемаларды анықтау, тұрғындарға психологиялық, құқықтық, педагогикалық және басқа да консультативтік-әдістемелік көмек көрсету мақсатында жас отбасыларды қолдау орталығы ашылды.
Мұнда психолог Ә.Серікова мен заңгер Е.Нұрпеисовтің көмегін тегін алуға болады. Жоғары білім мен біліктілікті талап ететін бұл қызмет неке, некелік серіктес таңдау және некеге түсу мәселелері бойынша психологиялық кеңес беру, ерлі-зайыптылардың құқықтық сауаттылықтарын жетілдіру, ажырасудың және отбасындағы зорлық-зомбылықтың алдын алу міндеттерін атқарады.
Аудандық ішкі саясат бөлімінің басшысы Б.Айтахметов бала тәрбиесіндегі және оның тұлға болып қалыптасуындағы ата-ананың рөлі мен отбасы құндылығының маңызына тоқталып өтті. Жауапты мамандарға бүгінгі таңдағы жұбайлар арасындағы мәселелер шешуді тапсырды.
Заңгер Е.Нұрпеисов жас отбасыларға «Неке және Отбасы» тақырыбында сабақтар ұйымдастыру, жеке психологиялық мәселелері бойынша жүгінген азаматтарға моральдық тұрғыда қолдау көрсетуге, дұрыс шешім қабылдауға ықпал етуге түрлі іс-шаралар жүргізілетінін айтты.
«Алакөл Экосистемасы» қоғамдық бірлестігінің төрайымы К.Бектемисова жас отаудың түтіні түзу шығып, махаббат пен татулық, береке-бірлік орын тепкен жылы ұяға айналуы, босағасы берік, болашағы нұрлы болуы ендігі осы орталыққа да байланысты екенін тілге тиек етті.
Шағын шаңырақтан шаттықтың үні естілсін, ұрыстың емес, ырыстың лебі ессін деген мақсатта жұмысын бастаған мамандарға сәттілік серік болсын. Күрмеуі қиын күрделі мәселе болса да негізгі маманына баратын мекенжайдан адаспаса, шешімі табылатыны сөзсіз. Сондықтан туындаған отбасылық сан түрлі сұрақтардың жан-жақты жауабын жас отбасыларға қолдау көрсету орталығынан алуға болады.
М.ҚУАТҚЫЗЫ.