Елбасы Н.Назарбаев соңғы Жолдауында: «Жастардың барлық санатын қолдауға арналған шараларды толық қамтитын әлеуметтік сатының ауқымды платформасын қалыптастыру керек. Сондықтан 2019 жылды «Жастар жылы» деп жариялауды ұсынамын», – деген болатын. Осы орайда Астана қаласының «Нұр Әлем» павильонында  «Тәуелсіздіктің ұрпақтары» атты Жастар жылының ашылу форумы өтті.

Ел болу – болашаққа ашылған даңғыл жол. Мемлекетіміздің ертеңі жастардың еңбекқорлығына, талап-тілегіне, арман-мұратына тікелей байланысты. Осы жолда мемлекет тарапынан жалын иелеріне барлық жағдайлар жасалып отыр. Жастар өз күш-жігерлерін, білімдерін тәуелсіз елінің гүлденуіне жұмсамақ.

Әр салада өз жобаларын көтеріп жатқан жастардың баяндамаларын тыңдап сөз жалғастырған Елбасымыз, Қазақстанның қазіргі жетіп отырған жетістіктері арқасында жаңа буын тәрбиелеп шыққанын жеткізді.

Мемлекет басшысы жаңа замандағы тәуелсіз елдің мұраты – жастардың білім мен біліктілікке талпынуы екенін түсіндірді. Сондай-ақ жер, тұрғын үй мәселесі, жұмыссыздықты жою, кәсіпкерлікті дамыту  мен IT және инновациялық технологияларды одан әрі дамыту туралы өзекті тақырыптарды қозғады.

Заманауи әлемде елдің қуаты ең алдымен, білім мен ғылымға тірелетін уақытқа келдік. Бүгінгі жас ұрпақ мұны анық сезініп, білім бұлағынан молынан сусындауға зейін қою керек. Жастар еңбек жолына түскенде ғана қоғамды өрге бастыра алады. Ендеше, Қазақстанның жарқын болашағы үшін қандай да бір іс тындыруға міндетті екенімізді естен шығармағанымыз абзыл.

Ұ.КЕНЖЕБЕКҚЫЗЫ.