Мемлекет жастардың құқықтарын қорғауға, олардың білім алуына, жұмыспен қамтылуына және әлеуметтік жағдайының жақсаруына ерекше көңіл бөлуде. Осы мақсатта түрлі мемлекеттік бағдарламалар мен бастамалар іске асырылуда, олардың бірі – Президенттік жастар кадрлық резерві, сондай-ақ жастарды қолдау мен дамытуға бағытталған бірқатар мемлекеттік бағдарламалар бар. Олар жастардың әлеуетін толық ашуға, олардың сапалы білім алуын қамтамасыз етуге және еңбек нарығына бейімделуіне мүмкіндік береді.
Бүгінде, Алакөл ауданында статистикалық мәліметке сәйкес 14-35 жас арасындағы жастар саны 18671-ді құрайды. Жастарды тұрақты жұмыспен қамту және кәсіпкерлік дағдыларын дамытуға бағытталған бағдарламалар іске асырылып келеді. Атап айтқанда, былтырғы жылы жұмыс тәжірибесін жинақтауға бағытталған «Жастар практикасы» бағдарламасына 80 адам, «Алғашқы жұмыс орны» жобасына 55 адам, «Ұрпақтар сабақтастығы» жобасына 3 адам, Қоғамдық жұмысқа тартылғандары 104 жас, Әлеуметтік жұмыс орындарына 15 адам жіберілсе, Кәсіпкерлік негіздерін 15 адам оқып, 22 жас кәсіптік оқуға жіберілді. Сондай-ақ, 8 адамға мемлекеттік грант берілді. Бұдан бөлек, жастарды қолдауға бағытталған «Дипломмен ауылға», «Жас кәсіпкер», «Серпін», «Ұрпақтар келісімшарты», «Тәуелсіздік ұрпақтары» және «Президенттік жастар кадрлық резерві» жобалары іске асып келеді.
«Дипломмен ауылға» бағдарламасы аясында 2024 жылы көтерме жәрдемақы 34 жас, тұрғын үй алуға қарастырылған төмендетілген пайызбен несие 17 жасты қамтып отыр. Биылғы жылға өтінім қабылдау жұмыстары қарқынды жүргізілуде.
Ауданымызда жастарды оқыту үшін түрлі курстар, семинарлар мен тренингтер ұйымдастырылуда. Сондай-ақ, жас мамандарды ауылдарға тарту үшін мемлекеттік бағдарламалар арқылы оларға қолдау көрсетілуде. Жастарға деген осындай жан-жақты қолдаулар олардың болашақта өз мамандықтары бойынша табысты еңбек етуіне, ауданның әлеуметтік-экономикалық дамуына өз үлесін қосуына ықпал етері сөзсіз.

“Alakol jastary” филиалының жетекшісі Гүлжан Базылханова