Мемлекет басшысы Қасым-Жомарт Тоқаев өз Жолдауында 2030 жылға қарай елімізде электр энергиясы тапшылығы туындайтынын айтқан еді. Энергетика министрлігінің мәліметінше, қазірдің өзінде электр энергиясына сұраныс артып, жетіспеушілік байқала бастаған. Бүгінде қоғам пікірі АЭС Қазақстанда салынуын қолдаса, енді бірі қарсы екенін жеткізеді. Халықтың бейбіт атомды пайдаланудан, атом электр станцияларын салудан және ядролық жарылыстардан қорқуы білімнің жетіспеуімен байланысты. Себебі басқа елдер атом энергиясын сәтті пайдаланып отыр, яғни тәжірибе бар. Атом электр станцияларын 32 мемлекет пайдаланады. Оның басым көпшілігі Еуропада, Солтүстік Америкада, Қиыр Шығыс Азияда және бұрынғы КСРО территориясында орналасқан. Қазіргі уақытта 19 елде электр қуаты 55 ГВт болатын 52 реактор салынып жатыр. Бұл ретте Беларусь, Біріккен Араб Әмірліктері, Бангладеш және Түркия алғашқы атом электр станцияларын салуда. Атом электр станциялары жұмыс істейтін жерде баға да тұрақты, энергиямен қамтамасыз ету де жолға қойылған. Ал біз болсақ, осындай ортағасырлық мәселелерді әлі талқылап жатырмыз.
Елімізде АЭС салуға қатысты дайындық жұмыстары басталып кетті. Қазіргі таңда атом электр станциясын салу үшін технологиялар зерттеліп, зерделеніп жатыр. ҚР Энергетика вице-министрі Жандос Нұрмағанбетов ТМД электр энергетикалық кеңесінің отырысында «Қазақстан атом электр станциялары» компаниясы келіссөздер жүргізіп, шетелдік тәжірибе қаралып жатқанын айтқан болатын.
Болашақта энергия тапшылығын болдырмас үшін қазірден бастап қамдану қажет деп ойлаймын. Бұл игі бастама еліміздің дамуына үлкен әсер етпек.

Гүлжан Базылханова