Жуырда Ресейлік АСА (Absolute Championship Akhmat) және еліміздің «Алаш Прайд» клубтарының ұйымдастыруымен Алматы қаласында ережесіз жекпе-жектен халықаралық турнир жалауын желбіретті. Дүбірлі додаға Бразилия, Беларусия, Ресей, Қырғызстан т.б мемлекеттерден айтулы спортшылар қатысты.

Бұл кеште ел намысын ту еткен жеті саңлағымыз өнер көрсеттті. Өкінішке орай алты спортшымыз жеңілістің ащы дәмін татты. Тек бір өреніміз ел мерейін асырды.

Ол Жайпақ ауылының тумасы, 66 келі салмақ дәрежесінде таласқа түскен Қасымханов Нұрсұлтан.

Барша қазақ елінің және туған жері Алакөлдің намысын қорғаған батырымыз азуын айға білеген ресейлік Александр Педусонмен октагонға көтерілді. Жиналғандардың көңіл қылын дөп баса білген жекпе-жекте жерлесіміз айқын басымдықпен жеңіске жетті. Айқас барысында оң қолынан алған жарақатына қарамастан тайсалмаған ұланымыз «Үздік жекпе-жек» номинациясын иеленді.

Ел намысын абыроймен қорғап жүрген саңлағымызға алғыс айта отырып, алдағы жекпе-жектерде сәттілік пен толайым табыстар тілейміз!

Ж.ЖИЕНБАЕВ,

Жайпақ ауылдық округі бойынша спорт ісі жөніндегі нұсқаушысы.