Денсаулық сақтау жүйесі — қоғамның әлеуметтік өмірінің ең маңызды саласы. Дені сау ұлт – мықты мемлекеттің негізгі тірегі.

Мемлекет басшысы Қасым Жомарт Тоқаевтың жыл сайынғы Қазақстан халқына Жолдауларында денсаулық сақтау жүйесін жандандыру мен медицина саласындағы өзекті мәселелер назардан тыс қалған емес. Ұлтымыздың саулығы – Жаңа Қазақстанды құру жолындағы мемлекеттік саясатымыздың аса маңызды бағытының бірі. Еліміздің басты байлығы адам және оның денсаулығы екендігін ескерсек, ауданымызда осы бағытта атқарылып жатқан жұмыстарға жақсы баға беруге болады.

Соның бірі, Жыланды ауылдық округінде орналасқан дәрігерлік амбулариясына кәсіпкер «Алакөл компаниялары» ЖШС-нің директоры Елжан Кәрімұлының демеушілігімен жаңа жедел жәрдем көлігінің кілті табысталуын айта аламыз.

Ауыл тұрғындарының игілігі үшін қолданысқа берілген жаңа «жедел жәрдем» көлігі заманауи техникамен жабдықталған. Таулы аймақта орналасқан елді мекенде ауа райының қолайсыздығына қарамастан халық мүддесіне қызмет етуге әзір тұр. Дәрігерлерге де көлікте барлық жағдай жасалған, науқасқа алғашқы көмек көрсетіп, тиісті жерге жеткізуге лайықталған.

Кез келген уақытта сақадай сай тұрып, науқастарға қарай құстай ұшатын жедел жәрдем көлігінің орны бөлек. Жаңа көлік халыққа қызмет ету сапасының жақсаруына игі әсер етіп қана қоймай, дәрігерлердің жұмыс істеуін біршама жеңілдететін болады.

Жалпы, биыл ауданымызда әлеуметтік-экономикалық тұрғыда денсаулық сақтау саласын жандандыру мақсатында демеушілер есебінен Үшбұлақ, Жыланды ауылдық округтеріне жедел жәрдем көліктері және Үшарал қаласына Жетісу облысының денсаулық сақтау басқармасының қаражаты есебінен реанимобиль көлігі сыйға тартылса, алдағы күндері аудан тұрғындарына 3 жаңа медициналық санитарлық автокөлік қолданысқа берілмек.

Өз тілшіміз.